في مشروع عملته من كام سنه وكان مربح جدا جدا

انا هقول لكم الخطه اللي كنت راسمها.. والخطوات اللي اخدتها ..

والفكره جت لي لما أخذت محل كبير للملابس في مدينه نصر.. ففكرت اني اعمل جزء للمنتجات الصغيره اللي عليها طلب..

زي توك الاطفال واكسسوارات الاطفال واي رفايع صغيره لا تزيد عن 2.5جنيه واقل..

الجزء دا كان بيبيع بمكاسب كبيره جدا ..

الخطه : فكرت اني اعمل اعلان واطلب 10شباب مندوبين :

هدي كل شاب عشر دست 120قطعه تكلفتها 180جنيه=اجمالي ال10شباب1800ج.

1200قطعةهتتباع ب2.5 =3000ج

التكلفه 1800-3000=1200ج مكسب يومي

تعالوا بقي نخصم.. 60جنيه لكل مندوب =600 جنيه

هوالك حاجه باظت حاجه اتسرقت 100جنيه ..يبقي المكسب الصافي 500جنيه فاليوم

اوم ايه .. ابتديت انفذ فعلا وجبنت 2مندوبين اجرب فيهم لكن جبت منتجات ب5جنيه تتباع ب7.5 جنيه.. الاتنين مناديب بس عملوا 300جنيه في اليوم.. مكسب.. وانا طلع لى زيهم

طبعا موضوع هايل جدا جدا

وكنت شاري لهم استوك كبير من البضاعه.. وبعد ماخلصوها.. كان عندي ضغط شغل جامد وكسلت اني انزل انقي بضاعه تانيه يوزعوها وأخد من وقت شغلي الاساسي .. واهملت الموضوع..

لكن فعلا انا ساعة ما عملت كجه كنت مش مشغول.. وكان في فتره انتقاليه بين الصيف والشتا ودى بتكون عند كل تجار الملابس .. كنت هكمل وهزود المناديب وخصوصا اني كنت عامل لهم خريطه بكل منطه هينزلوا فيها..

ومحفظهم اسلوب الكلام مع الناس.. مش يدخل يقول كلام يزهق الناس منه

كان اسلوب تاني خالصكان ناجح جدا جدا بفصل الله.. وهى دى الزتونه على فكره.. ازاى لما تدخل على انسان تخليه يشترى بنسبه كبيره

مش الاسلوب العقيم بتاع تسمحلى اخد من وقت حضرتك دقيقه

كانت تجربه ناجحه جدا.. وكانت من ضمن اقتراحاتي لشباب كتير وكتير نفذوعا وعملوا منها رسمال كويس.. وفي منهم معانا هنا بالجروب.. وكانوا بينفذوها لغايه ما يعملوا مبلغ محترم.. وبعدين ابتدوا يشتغلوا جمله من بيت احدهم وبعدين اجروا محل وربنا كرمهم اخر كرم.

زمااان واحد صديقي موظف كان بيقولى العربيه ب120ألف جنيه.. يعني لازم كل شهر احوش 1000جنيه لمده 120شهر يعني عشر سنين علشان اجيب العربيه دي.. ودا مستحيل..

كنت ديما اقوله متتحسبش كده.. انت اسعي.. والباقي بتاع ربنا.

ودارت الايام وقبل ال10سنين بكتيييير كان عنده عربيه بأكتر من المبلغ دا.. وفيلا في اكتوبر.. ودلوقتي بسم الله ماشاء الله..

سعي.. وكان سمعته كويسه في السوق وكان التجار بيدوله بضاعه بالأجل علشان سمعته.. وكان منتظم في السداد.. ولنيته الطيبه لقي محل سعره مناسب..

وابتدي المشوار.. ومازال بفضل الله ربنا يبارك له.

علشان كده انا مهتم جدا بالمشاريع الصغيره.. بل ومتناهية الصغر..

لأن دى المشاريع اللى ممكن تعمل منها رأسمال كبير يكون نواه لمشروع كبير

ولأني عشت بنفسي تجارب كتير جدا بدأت بأقل القليل وبفضل الله وصلت بسعيها وسمعتها الطيبه ونيتها الكويسه لما لا يتوقعوه هم أنفسهم.

لاتيأسوا.. أسعوا بنيه طيبه.. ابنوا سمعه طيبه.. توكلوا علي من بيده مفاتيح كل شئ.. تفاءلوا.. وبأذن الله هيرضيكم.

صباحكم سعاده.

#عادل_المراكشي

#الهدف_جنه

للشباب اللى مش معاهم ولا مليم وعايزين يبقوا مليونيرا

ببركه ربنا .. كله يجمع هنا ..

فالبوست دا هقولك ازاى تجمع رأسمال مال كبير حتى لو ممعكش اى فلوس نهائي .. وازاى تاخد خبره وتعرف تتاجر .. وتعرف ازاى تشترى وازاى تبيع ..

شوف ياسيدى اول الكلام انسي تماما انك عايز تبقي مليونير وانسي تماما انك عايز تشتغل علشان تكسب كتير ..

الكلام دا مش منطقي للشباب لكن العواجيز اللى زينا اتأكدوا بعد العمر ما عدى انه هو دا الصح ..

معناه ايه الكلام دا ؟؟

معناه انك تحط فدماغك انك عايز تشتغل علشان رزقك المكتوب لك ربنا يبارك لك فيه .. وتستفيد منه فشبابك .. رزقك مقدر ومكتوب ومحدد لاهيزيد ولا هينقص .. فأحنا هنشتغل علشان بس ربنا يبارك لنا فيه ويخلينا نصرفه فحاجات تسعد قلبنا وتفيدنا ويحفظه لنا من اى هلاك ..

البدايه دى مهمه جدا ..

نيجى بقي للتنفيذ وخطواته :

لازم تعرف الاول ان مفيش حد عايز بيبقي مهندس او دكتور او اى مهنه بيصحى الصبح ويروح يدخل كلية الطب ولا الهندسه .. طبعا مفيش الكلام دا .. انما الطبيعي ان اهلك بياخدوا بأيدك ويحطوك على اول الطريق .. وبتطلع السلم واحده واحده .. لغايه ما توصل للي انت عايزه بمجهودك .. الكلام دا لان في شباب عايز يشتغل انهارده .. بكره يكسب ويبقي غنى .. مفيش الكلام دا ومفيش اساسا فأيدك اى حيله ولا مجهود لزياده رزقك لاااازم تفهم كده وتفضل فاكر الكلام دا واوعى الشيطان ينسيه لك ..

ندخل بقي على كى چى1 تجارة :

1- ان كنت موجود فالقاهره هتنزل الموسكى والعتبه وشارع العطار ودرب سعاده والازهر والفجاله وشارع الترعه البولاقيه ودا بعد نفق شبرا مباشرة على الجنبين ..

ولو كنت بلد اخرى اعمل بحث عن تجار الجمله والمستوردين والمصانع .. هتلاقيهم على جوجل.

2- هتاخد أچنده صغيره وقلم ولومعاك موبايل بكاميرا .. هتنزل الصبح بدرى وتبدأ تاخد شارع شارع وخن خن .. وتشوف البضاعه شكلها ايه ونوعها ايه .. هتلاقي هدوم .. هتلاقي ادوات مدرسيه ومكتبيه .. هتلاقي ادوات منزليه .. هتلاقي خردوات .. اكسسوارات موبايل .. اكسسوارات اطفال .. اكسسوارات حريمى .. ملابس بيت .. لانچري .. مفروشات .. ملابس خروج .. طرح محجبات .. لعب اطفال صغيره .. لعب اطفال كبيره .. ادوات زينه .. خردوات .. ادوات كهربائيه صغيره ........الخ هتلاقي كل ما تتخيله وكل ما لاتتخيله ..

هناك سوق الجمله لمعظم منتجات المصانع ولمعظم المستوردين .. هتلاقي العجب .. طول ما انت ماشي تسأل عن الاسعار .. وتكتب عندك اسم المحل والتليفون وتصور اليافطه وتاخد كارت للمحل فيه العنوان ..

هتعمل كده كتير؟؟ ايوه .. انا مثلا قعدت شهر كامل انزل يوميا اعمل الكلام دا وكل يوم كنت بكتشف جديد .. طبعا مش انا اللى بكتشف .. انما كنت بحس انى كل ما بتعب بلاقي ربنا يدخلنى شارع مدخلتوش قبل كده والاقي فيه اسعار احسن واصناف احسن .. كنت بحس ان الموضوع كله فأيد ربنا .. لكنه عايزنى اسعى واتعب والف ..

لان زى ما البيع رزق .. الشراء برضو رزق و البضاعه الحلوه رزق ..

#لفينا وتعبنا وجمعنا معلومات .. وعرفنا فيه ايه وعرفنا جمله بكام ..

هنركز بقي على اصناف معينه عجبتنا وتكون سريعه البيع علشان نبدأ بيها .. وهتتفاجأ لما تعرف انك ممكن تبدأ ب500جنيه بس .. ولو فعلا مش معاك هسلفهم لك تبدأ بيهم وترجعهم فالوقت اللى تحدده انت .. كده ملكش اى حجه لأنك تبدأ ..

تمام جدا .. خلصنا معرفه مصادر البضاعه واسعارها بالجمله ..

هناخد بعضنا بقي وننزل نلف على محلات القطاعى اللي بتبيع الحاجات اللى شفناها دى وعرفنا سعرها كام .. وهندخل على جروبات الفيس وصفحات الناس اللى بتبيع ونعرف هى بتتباع بكام قطاعى ..

ونعمل لنا ملف فيه صور الحاجات اللى بتتباع قطاعى بأسعارها .. هناخدها من الجروبات المختلفه ومن المحلات القطاعى ..

#كده عرفنا الاصناف بكام جمله وبكام قطاعى ..

اى تاجر ميعرفش الكلام دا يبقي مش #تاجر ولا هينفع ولا هيعمل اسم .. ليه؟؟ لان التاجر سمعه .. واذا بدأت تجاره من اماكن مش بتبيع بسعر الجمله ورجعت تبعها بنسبه ربح فأكيد هتكون اغلى بكتير من السوق واللى جربك مره مش هيعملها تانى وهيقول لغيره وغيره هيحزر الناس منك وبكده تنتهى تماما بعد فتره طويله اوقصيره ..

الخطوه اللي بعد كده:

ازاى هشترى من التجار ؟

هتدخل على التاجر اللى عرفت انه اقل سعر وافضل بضاعه .. هتسأل عن سعر النوع اللى انت عايزه .. لو البضاعه متاحه ادامك يبقي تقول بسم الله وتنقي وتختار منها بأيدك .. لو في موديلات مختلفه نقي الاحلى ولو فيهم الوان كتير نقي الالوان اللى تحس انها هتعجب الناس ..

اذا البضاعه مرصوصه وهتطلب انت .. يبقي اطلب ازيد شويه علشان تختار منها اللى هيعجبك وترجع الباقي وانت واقف فالمحل .. ديما خليك مبتسم .. واتكلم مع العمال فأي مواضيع غير البيع والشرا .. عايزك تكسب ودهم وتسيب اثر عندهم علشان يفتكروك لما ترجع لهم ومعاملتهم معاك تبقي فيها ود وسلاسه ..

طبعا دا نموذج بسيط للتعامل وباذن الله هعمل لكم دوره طبعا مجانيه قريب فيها شرح بالتفصيل لكل حاله باذن الله.

ازاى بقي هنبيع اللى اشتريناه ودا اهم ما في الموضوع ؟؟

لازم خلال ما احنا بننزل وندور على البضاعه وندرس الاسعار والاماكن .. لازم لما نروح كل يوم نعمل خطه للتسويق .. يعنى نقعد مع نفسنا كده ونفكر فكذا مكان وكذا طريقه هنبدأ نبيع فيهم او ليهم .. طبعا كل واحد ظروفه مختلفه عن التانى ..وعلشان كده هقول لكم افضل او اغلب طرق البيع وانجحها .. وبرضو هشرحها لكم بالتفصيل الممل فالدوره المجانيه ادخل هنا علشان تتابع المواعيد #عادل_المراكشي باذن الله.

طرق تصريف وبيع البضاعه :

هناخد مثال .. انت مثلا اشتريت اكسسوارات موبايل .. او اشتريت حاجات للشباب زى الايس كاب والشرابات الشبابي والرجالى .. او اشتريت اكسسوارات اطفال ومعاهم لعب اطفال خفيفه وادوات مدرسيه ......الخ

1- افتكر اننا هنشتغل وهنبدأ ودى تعتبر اول خطوه فالسلم فقط ومش دا الطريق اللى هكمل فيه .. لكن دى اول خطوه علشان اتعلم البيع والشرا .. والتعامل مع التجار .. ومعرفة السوق .. وازاى اتعامل مع الزباين .. ايه اللى بيبسطهم .. وايه اللى بيزعلهم .. وايه اللى بيفضلوه .. وكمان علشان اعمل اسم عند التجار وعند الزباين واعمل سمعه كويسه لنفسي .. دا بالاضافه طبعا اننا عايزين نجمع رأسمال كبير شويه نبدأ بيه الخطوه التانيه او السلمه التانيه اللى هنطلعها بأذن الرحمن ..

يبقي دلوقتى هنتكلم عن الاماكن او الناس اللى ممكن نبيع لهم .. عندنا اكتر من طريقه.. ويااااريت نكون احنا حددنا طرق معينه تناسبنا وتناسب ظروفنا لما كنا بنعمل خطه التسويق لنفسنا ..

المهم .. اول خطوه هنعمل صفحه على الفيس وهنعمل جروب على الفيس وجروب على الواتس وجروب على تليجرام ..

هنزل عليهم كل الصور اللي عندنا او صور من جروبات تانيه لمنتحات كنت شفتها فالسوق ومعرفتش تصورها لكن هتكتب عليها السعر بتاعك .. عموما متزودش عن 5جيه فالقطعه اللى بتعدى عشره جنيه .. والاقل من كده من اول جنيه لخمسه هتعمل مكسب100٪..فوق ال٥جنيه هتحط 2.50جنيه زياده ..

اوعي تكتب الاسعار على الخاص .. ووضح انك بتبيع وقطاعي جمله .. واكتب سعر الجمله وسعر القطاعى .. ليه ؟؟ هقولك بعدين ودا سر هيجيب لك مبيعات كتير جدا بأذن الله ..

يبقي هننزل كل المعلومات دى على كل الحسابات اللى قلنا عليها وهنكتب عنوان المنطقه اللى انت ساكن فيها مثلا مدينه نصر شارع عباس يوسف بس كده متكتبش حاجه بالتفصيل .. هتكتب مكان التسليم وجنبه العنوان دا ..

مش عايزين ندخل فمشاكل التوصيل دلوقتى .. اللى عايز .. يجى لغايه عندنا .. وكده كده احنا هنركز فالدعايه بتاعتنا على المنطقة اللى ساكنين فيها ..

دى اول خطوه ببساطه طبعا لان احنا لسه فأول الطريق ..

الخطوه اللى بعد كده بقي هى الاماكن اللى هبيع فيها هكتب اكتر من مكان وطريقة وكل واحد يختار الطريقه اللى تناسبه وتناسب ظروفه ..

اولا : الاقارب

الجيران

الاصدقاء

لك قريب بيشتغل فمكان فيه موظفين كتير .. دا بقي كنز .. ادامك حل من اتنين .. الاول سهل والتانى عايز جرأه .. الاول انك تعمل له زياره ساعه انتهاء العمل ومعاك بضاعتك حاطتها فشنطه صغيره شيك وهتفرجه على اللى معاك هتلاقي زمايله حب استطلاع هيجوا يتفرجوا .. وطالما انت حطيت النسبه اللى قلت لك عليها فتأكد انك هتبيع معظم بضاعتك في يومين او تلاته بالكتير ..

الحل التانى انك تتشجع كده وتقف ادام اى مكان وقت خروج الموظفين مش عايز اقولك اد ايه الموضوع دا ناجح .. ومتتكسفش وخليك ديما حاطط فبالك انها خطوه وهتعدى ..

المهم

ان اللى هنبيع بيه هننزل تانى نكرر البضاعه ونزود عليها اصناف الناس هيكونوا طلبوها مننا ..

على فكره انا مش بخطط لك لكن بفتح لك طرق تمشي فيها وانت ماشي فيها هنلاقي ربنا سبحانه وتعالى وجهك لاماكن تانيه خالص سواء فالبضاعه او فالبيع المهم انك طول ما انت راضي ربنا ومش بتعمل حاجات تزعله اطمن جدا جدا جدا .. هنلاقي كل خطواتك فيها توفيق ..

بعد كده يوم ورا يوم هتلاقي نفسك بتعرف حاجات اكتر وباذن الله رأسمالك ال500جنيه دول بقوا 2000على اخر الشهر ودى نسبه كبيره جدا ..

احنا عايزين نستمر كده فحدود 3شهور او اكتر شويه لغايه ما يبقي معانا رأسمال معقول علشان نبدأ الخطوه التانيه باذن الله ..

باذن الله هفضل معاكم خطوه بخطوه سواء هنا على الجروب او هعمل لكم ورشه عمل نشرح فيها كل نقطه بالتفصيل ويبقي لقاء مباشر للاجابه على اى اسأله..

الكلام اللى فوق دا هتقرأه فدقايق لكن لو فعلا عايز تبدأ مشوار التجاره .. فمعظم التجار الكبار والكبار جدا بدؤا كده واقل من كده كمان ودلوقتى في منهم اللى بقي يصنع وعنده مصانع وفي اللى استمر فالتجاره وبقي عنده سلسله محلات مشهوره جدا وفي اللي بقي يصدر وفي اللى خد توكيلات عالميه ..

وباذن الله باذن الله انت هيكون لك مكان كبير فالسوق .. بشرط تاخد بالأسباب .. تتوكل على الله .. وهدفك اسعاد الناس وتقديم منتج او خدمه تفيد الناس وتخفف عنهم ضغوط الحياه ..

نسيت اقولك اهم سبب لنجاح مشروعك .. لازم قبل ما تبدأ اى خطوه .. تتوضي .. وتدخل اوضه نومك وتقفل على نفسك وتصلي ركعتين بنية التوبه من كل ذنب عملته فحياتك .. وتقول لربنا يارب سامحنى ..

وعنى على طاعتك ورضاك .. الكلام دا تقوله من قلبك .. تقوله وانت ناوى فعلا تبدأ صفحه جديده من حياتك .. تقوله وانت نفسك ان ربنا يسامحك علشان يرضي عنك .. وخليك متأكد وواثق ان ربنا لما يرضي عنك .. هتعيش حياه عمرك ما كنت تحلم بيها .. وهتندم على كل لحظه عشتها قبل كده ..

المهم انك لازم تعمل كده لان احنا مهما سعينا وجرينا وحاولنا مش هنتوفقك الا اذا كان راضي عنك .. وخليك عارف ان في ناس زى النيله وبيعملوا بلاوى سودا كتير وناجحين جدا جدا فشغلهم .. لكن والله الذي لا اله الا هو حياتهم الشخصيه كلها مشاكل .. واعرف ان لو معاك فلوس الدنيا وبيتك مش سعيد مستحيل تلاقي السعاده فمكان تانى غير حلال .. وهتلاقي حياتك كلها نكد ومشاكل وتعب اعصاب وارهاق وقلق .. انما بقي لما تكون راضي ربك وتستلم منه رزقك هتلاقيه هو سبحانه اللى بيسهل لك كل خطواتك وبيخلى بيتك من اسعد البيوت .. ومين فينا مش بيتمنى دا ؟؟

خلاص كده الموضوع سهل جدا جدا والتوبه مقبوله فورا باذن الله بس خلى بالك اوعى تكون واكل حق حد لو ظالم حق حد لان حقوق الناس ملهاش توبه الا اذا رجعتها لأصاحبها فخلى بالك من النقطه دى ..

يبقي كده هناخد بالأسباب ..

وهنرضي الرزاق مالك الملك عننا ..

وهنتوكل عليه سبحانه ..

وهنقفل النيله دا وننزل نسعى على رزقنا ..

وباذن الله باذن الله مستحيل والف الف مستحيل نعمل كده وربنا يكسر بخاطرنا .. مستحيل لان هو الجبار فلازم هيجبر بخاطرنا ويبارك لنا كل خطوه وهيوجهنا للصح .. ياولاد دا ربنا ياولاد .. شوفوا احنا بنحب عيالنا اد ايه .. يبقي اللى خالقنا بأيده حبه لينا شكله ايه وخوفه علينا اد ايه .. بس منزعلوش .. معلش انا بكرر الموضوع دا كتير لان والله العظيم كل حاجه بأيده وانا نفسي كلكم ربنا يكرمكم ويوفقكم ويبارك لكم في رزقكم اللهم امين آمين آمين يارب العالمين.

#عادل_المراكشي

#الهدف_جنه

مشروع ب 500 جنيه يكسب 200 جنيه فاليوم

معانا اخت فاضله بالجروب عايزه تعمل مشروع.. ومش معاها رسمال.. وعارضه شقتها للبيع وبتطلب مننا ندعي لها علشان الشقه تتباع علشان تعمل مشروع..

اختنا الكريمه..

أسمحلي لي أقول لحضرتك..

اوعي تبيعي الشقه مهما كانت الظروف.. انسي ان عندك شقه تمليك انسي الموضوع دا خالص واتصرفي علي هذا الاساس..

لو حضرتك محتاجه رسمال.. ابدئي زينا كلنا ما بدأنا.. وكبري نفسك واحده واحده ومتخافيش الموضوع مش هيطول.. لكن هيطول لو فضلتي قاعده علي النت وعواقبه هتبقي وخيمه جدا..

ابدأي ولو ب500 جنيه انزلي حضرتك الفجاله.. انزلي شارع الترعه البولاقيه اللي بعد نفق شبرا علي طول.. انزلي الموسكي.. انزلي درب سعاده امام الموسكي فيه العجب.. الاماكن دي انا بنفسي مجربها..

في ناس بتقول النزهه وفي ناس بيقولوا ابو النمرس..

المهم حضرتك انزلي المكان القريب منك فيهم..

ال500 جنين هيكسبوا صافي 200 جنيه..

هاتي الحاجات المستهلكه.. علبه اقلام جاف.. شرابات اطفال.. توك اطفال مختلفه.. لانجري بناتي للي بيجهزوا.. هاف كول اطفال للمدارس.. دي نماذج بس.. لكن لما حضرتك تنزلي ربنا هو اللي هيوجهك وهو سبحانه اللي هيوقع عينك علي الحاجات اللي هتتباع معاكي.. زي ما بيعمل معانا.. انت ملكيش اي يد فأي حاجه.. المهم النيه والسعي وبعد كده هتتأكدي من كلامي انه سبحانه هو اللي بيوجهنا..

كلنا بدأنا كده ولا كنا نتخيل اننا نوصل للي وصلناله.. وبرضو ولا كنا نتخيل ان الدنيا تقف معانا تماما بعكس ما كانت ماشيه زي الفل.. هي دي التجاره وحلاوتها يوم فووووووق ويوم تحت..

عجبتني جدا مذيعه كانت مستضيفه راجل داعيه جميل وبتقوله علي احد المشاكل.. قالها ربنا بيقول ايه.. وراح قايل آيه فيها وعد من ربنا.. وقال لها كده يبقي الموضوع محلول.. لقيتها بتبص له اوي وبتقوله.. يااااااه اد كده حضرتك مصدق ربنا..

من ساعة الجمله دي وانا بقيت اركز اوي فالآيات واصدقها..

وعايزك انتِ كمان تصدقي ربنا..

وكمان لازم تعرفي مين السبب اللي مخليكي مرعوبه من الفشل ومن الفقر..

فحالتنا هنا نشوف ربنا بيقول ايه ونشوف هنصدقه ولا نصدق ال.....

"ﺍﻟﺸﻴﻄﺎﻥ ﻳﻌﺪﻛﻢ ﺍﻟﻔﻘﺮ ﻭﻳﺄﻣﺮﻛﻢ ﺑﺎﻟﻔﺤﺸﺎﺀ ﻭﺍﻟﻠﻪ ﻳﻌﺪﻛﻢ ﻣﻐﻔﺮﺓ ﻣﻨﻪ ﻭﻓﻀﻼ ﻭﺍﻟﻠﻪ ﻭﺍﺳﻊ ﻋﻠﻴﻢ ( 268 ) ﻳﺆﺗﻲ ﺍﻟﺤﻜﻤﺔ ﻣﻦ ﻳﺸﺎﺀ ﻭﻣﻦ ﻳﺆﺕ ﺍﻟﺤﻜﻤﺔ ﻓﻘﺪ ﺃﻭﺗﻲ ﺧﻴﺮﺍ ﻛﺜﻴﺮﺍ ﻭﻣﺎ ﻳﺬﻛﺮ ﺇﻻ ﺃﻭﻟﻮ ﺍﻷﻟﺒﺎﺏ ( 269 )"

لا ولاحظي اخر الكلام.. من يؤت الحكمه فقد اوتي خير كثيرا.. وكمان مش هيفتكر الكلام دا ويعمل به الا اصحاب القلوب .. مش اي حد..

خليكي من اصحاب القلوب الاذكياء..

يبقي ربك بيحذرك ان الشيطان بيوعدك بالفقر علشان كده انت مرعوبه من الفشل والفقر .. لكن ربنا بيوعدك بفضل من عنده.. يبقي تصدقي مين؟؟

تتوكلي علي الله طمعانه ففضله.. ولا تفضلي مرعوبه من وسوسه الشيطان؟؟

يبقي حضرتك.. امسكي ورقه وقلم واكتبي..

1 هتصرف فال 500 جنيه.

2 هنزل الموسكي او شبرا او.اى سوق للجملة في بلدك .. المهم حددي مكان.

3 هركز علي...... وحددي اصناف معينه.. واحتمال كبير لما تروحي تلاقي نفسك بتجيبي اصناف تأنيه خالص.

4 هرجمع باذن الله واعرض الحاجات دي علي...... وعلي.... وعلي...... حددي سواء جيران او اقارب.. لكن اقولك على سر ياريت لو ليكي او تدوري علي اي قريبه بتشتغل وهي ممكن توزع لك لأصحابها وزمايلها ولها نسبه.. المهم حضرتك حددي الخطوات واتركي التنفيذ تماما علي ربنا سبحانه وتعالى..

5 اللي هتبيعي به هتنزلي تشتري بيه.. شهر كده او شهرين هتلاقي معاك رسمال محترم جدا.. وهتندمي علي الوقت اللي ضيعتيه علي النت بتحاولي تدوري علي مشروع.. والشيطان وراكي عمال يحبطك ويخوفك..

توكلي علي الله.. ربنا عايزنا نسعي عايزنا نفيد بعض ونكون سند لبعض.. بالسعي انتي هتكسبي.. وتاجر الجمله هيكسب.. والمصنع هيكسب.. وبالتالي العمال هتكسب.. وبشغلك البسيط دا شوفي حضرتك اتسببتي ففتح كام بيت.. او اتسببتي ان بيوت متتقفلش..

علشان كوووووول دول يفضلوا مستورين ربنا بيوفق اللي بيسعي..

حالآ هاتي ورقه وقلم.. وقولي بسم الله توكلت علي الله وأبدئي بكتابه الخطوات...

وباذن الله هترجعي تحكي لنا احلي توفيق من الله.

وافتكري ديما اللي بينزل يسعي علي رزقه فهو في سبيل الله..

( مر على النبي رجل.. فرأى أصحاب النبي من جلده ونشاطه ما أعجبهم، فقالوا: يا رسول الله، لو كان هذا في سبيل الله..

فقال رسول الله صلى الله عليه وسلم: إن كان خرج يسعى على ولده صغاراً فهو في سبيل الله.. وإن خرج يسعى على نفسه يعفها فهو في سبيل الله.. وإن كان خرج رياء وتفاخراً فهو في سبيل الشيطان")

كده بقي تبقي خلصت.. ويابخت اللي بينزل واللي هينزل .. ويا الف خساره علي اللي قاعد ورا الشاشه مستنيها تُفرج.

#عادل_المراكشي

#الهدف_جنة

خطوات مهمه جدا لزيادة التفاعل علي صفحتك وعلى الجروب في الفيس بوك

اسئلة عامه او طلب استفسارات ايرد عليها المتابعين.

المسابقات .. الصعبة .

آراء العملاء حول منتجاتك او خدماتك.

احكى جزء من قصة كيف بدأت في مجالك.

اكتب مشكله حصلت لك واكتب حلتها ازاى.

حذر الناس من أخطاء ارتكبتها في شغلك.

اكتب بوست بتتكلم فيه عن معلومه مهمه خطوة بخطوة .. والافضل تكون في مجالك.

اكتب بوست عن آخر الاخبار في مجالك.

اكتب بوست عرض بضاعتك او خدمتك بطريقه وديه.

وانت بتعرض تجارتك او خدمتك اعرف انك بتتكلم مع انسان عنده مشاعر فلازم توضح له ان مشكله هو بيعانى منها وان منتجك هيحلها له وبعد كده اكتب الوصف وفي النهاية اكتب السعر .. اكتب السعر .. اكتب السعر .. ولو حجه الناس انها عايزة تفاعل ..

بلاش تكتب الالوان مثلا او المقاسات او اخفي اى معلومه تانيه غير السعر .. وبكده الناس هتدخل تسأل .. ويزيد التفاعل ..

انما تخفي السعر اكبر غلط ..

طالما بضاعتك انت عارف انك شاريها من اول يد او انت اول يد ..

وكمان دارس سعر السوق القطاعى .. ومسعر زى السوق او اقل قليلا ..

كده مفيش داعى لاخفاء السعر ابدا ..

واللى بيسبب عدم ثقه الغالبيه في الاعلان.

بالخطوات السابقه انت هتبنى لنفسك براند شخصي او علامه شخصيه .. هتتعرف وتتحب وتنبي ثقه بينك وبين اعضاء صفحتك ..

وبالتالى طالما وثقوا فيك بالتاكيد هيثقوا في اى منتج او خدمه انت بتقدمها ..

انما لازم طبعا تكون فعلا سلعه جيده.

اتمنى لكم جميعا كل التوفيق والنجاح

#عادل_المراكشي

#الهدف_جنه

المشاريع الصغيرة الاكثر استقرارآ في الوقت الراهن .. بشرط

وجود خبره ولو بسيطه.

البدأ ب10٪فقط من راسمالك ثم عندما تجد المشروع ينمو ابدأ بضخ 10٪ أخرى او 20٪بالكتير .. ثم ضخ من ارباحك.. حذارى تدخل في مشروع خبرتك فيه قليله برأسمال كبير.

نتكلم الان عن المشروعات الاكثر استقرارا ونموا باذن الله في الوقت الحالي :

١- توزيع المواد الغذائية .. ولعب الاطفال الشعبيه .. ارباحها فوق الممتازه .. ورأسمالها بسيط جدا.

٢- التسويق الالكتروني للغير .. اسهل شغل من البيت .. فقط تعرف خطواته واسراره .. هتحقق نجاح كبير بفضل الله.

٣- المطاعم البسيطه .. من المشاريع الصغيرة المربحة ديما لو تميزت عن غيرك طبعا.

٤- اكشاك وعربيات الاكل من المشاريع الصغيرة الجديدة.

٥- اكشاك ومحلات القهوة والمشروبات السريعه المهم تعمل لنفسك ميزه عن غيرك

٦- توزيع البن .. مشروع خطير جدا جدا جدا .. لان البن من اكتر المشروبات استهلاكا .. وخصوصا اذا ربنا كرمك بتاجر عنده انواع جيده .. وهيعلمك خواص كل نوع .. وانت تبدع في التوليفات.

٧- المقاولات المحدودة .. من اعلي الارباح .

٨- الملابس (صناعة او تجارة) .. وخصوصا الملابس المستهلكه اى التى تستهلك يوميا.

وطبعا ولأن السعي من واجبنا والتوفيق من الله وحده .. فلااازم نرضيه عنا.. مش علشان يوفقنا فالمكسب لأن الرزق مقدر ولكن علشان يوفقنا في الاستمتاع بالمكسب.

وطول ما النيه طيبه ربنا هيوفقكم؟

#عادل_المراكشي

#الهدف_جنه

حل مشكلة غلاء الأسعار

 

_ الحل الوحيد هو زيادة دخلك .. و زيادة دخلك سيحدث عندما تبيع شئ ما.

*_ لكن انا لا اعرف ابيع ولا معى رأسمال.

_ كل ذلك غير مهم بالمره .. المهم يكون عندك عزيمه وموبايل ونت .. وفعلا تكون عايز تحسن أحوالك الماديه ..

وأترك الباقي لى ..

سوف أقول لك كيف تبيع وماذا تبيع وأنت جالس في بيتك .. بل كيف يشترى منك الناس علي مدار اربعه وعشرون ساعه حتى وأنت نائم .. تصحي في الصباح تجد عمليات بيع تمت وتجد في حسابك ارباحها.

*_ حضرتك كلمني بالعقل الله يكرمك .. معقول كل دا يحصل .. وانا في البيت ومن غير رأسمال؟؟

_ علي فكرة ناس كتير بتشتغل كده لكن للأسف مش بيحبوا يقولوا التفاصيل .. احتمال بيخافوا من المنافسه ..

لكن باذن الله الأمر بسيط لكن محتاج شغل وجدية .. وبعض الشروط طبعا ..

لأن الايام اصبحت صعبة وكل يوم بيعدى من غير ما تتقدم خطوه ..

انت فالحقيقه بتتأخر خطوات كتير ..

علشان كده حبيب اني اقول لكم علي خطه المشروع اللي انا عملته وبفضل الله نجح جدا

اذا اى عضو معانا حب يعرف التفاصيل بالتفصيل.. سيكون من خلال دورة اونلاين مكثفه باذن الله في اسرع وقت حتى يستفيد الجميع ..

فقط ..

يكتب لي في التعليقات .. وسأرسل له رابط الاشتراك .. وسيكون به بعض الأسئلة التى سوف يتبين من خلالها هل الكورس مناسب له أم لا ..

وباذن الله سيكون هذا الكورس خير لمن سيقع عليه الأختار لحضورة ..

وسيكون باب رزق كبير بإذن الله تعالى.

وأدعو إي إنسان لديه علم او خبرة في اى مجال بيدخل له دخل ياريت ينقل خبرته للغير .. وخصوصا في تلك الايام الصعبة.. ولا يخاف علي رزقه .. بل يتأكد ان عوض الله له سيكون عظيماً ..

ربنا تقبل منا جميعا اى عمل يقربنا اليك وأستخدمنا دائما لخدمة بعضنا البعض.

#عادل_المراكشي

#الهدف_جنه

لهذه الأسباب يجب أن تنفق أموالك على التسويق بالفيديو .. لأن :

 

الفيديو = قفزة في الوصول والمبيعات.

مصداقية أكبر.

مؤثر ولو كان متواضعا.

انتشار أوسع في منصات التواصل.

محركات البحث تحب الفيديو.

إقبال هائل من الهواتف الذكية.

يوضح الأمور أكثر من أنواع المحتوى الأخرى.

اهتموا بالفيديو والريلز والاستورى .. انشروه في التيك توك والفيس والانستجرام واليوتيوب.

#عادل_المراكشي

#الهدف_جنه

معلومات هامه جدآ من مسافر الى الصين

اسمحولي بمشاركتي الاولى ان أحاول الاجابة عن بعض الاسئلة التي تدور في بال أي شخص يرغب السفر للمرة الأولى للصين للتجارة ،،،

وهي كثيرة ومتشعبة أحاول ذكر الأساسيات والأولويات منها ،،،

واتمنى من الاخوة الاعضاء اصحاب الخبرة ان يدلوا بدلوهم في هذا الموضوع المفتوح للجميع لنفيد ونستفيد،،

في البداية اقول وبالله التوفيق :

الاستيراد من الصين خطوة بخطوة

 الكثير يسألون عن الصين والتجارة فى الصين 
ووجدت أهم من ذلك أن معظمنا نحن العرب لا يعرفون غير مدينتين يتوجهون إليهما فى الصين وهما مدينى كوانزو و ايوو .
بالطبع المعظم يسأل عليهم لسبيين :
الأول : أنهما بهما مراكز تجارية كبيرة للبيع 
الثانى : أن هذه المدينتين يكثر بهم العرب بكميات كبيرة من تجار إلى مكاتب تجارية .