أبدأ مشروعك دلوقتي حالآ .. معاك فلوس او ممعكش .. ومش هتفشل ..

انا عمري كله فالسوق فوق ال30 سنه وعمرى ماشفت مشروع بيفشل كل المشاريع ناجحه .. لما بتبدأ صح .. والمشاريع اللي بتفشل هي اللي بتبدأ غلط ..
ولو متفهمش فمشروع وعايز تعمله ابدأ بأقل مبلغ بحيث لو ضاع متتعبش .. اتعلم فيه .. 
مينفعش .. مينفعش مينفعش اعمل مشروع مفهمش فيه ..
الاجزخانه بتكسب .. والزبال بيكسب .. والدكتور بيكسب .. لكن الناس دى مصحيتش الصبح قالت .. اه والله مشروع الزباله دا حلو وبيكسب انا هشتغل فيه .. ولا واحد صحي الصبح قال انا هفتح عياده ..
مش كل حاجه راس المال .. ياما ناس اشتغلت من الصفر وبقت مليونيرات .. وياما ناس جمعوا قرشين من وظيفه او سفر او مشروع وعايزين يعملوا بيهم اى حاجه تدخل لهم فلوس .. لأ .. مينفعش كده ..

اللي معاه قرشين يروح يتعلم فأي مشروع وميتكبرش .. بدل ما فلوسه تضيع ويتذل ادام الناس ..
حافظوا علي فلوسكم .. اشتغلوا ب١٠℅ من اللي معاكم لو معندكوش خبره .. اوعوا تزودوا عن كده ..
شاركوا بيهم حد عنده خبره وابدؤا واحده واحده لكن فلوسك انت اللي مسؤل عنها اوعي تسلمها لحد ..
ومن خلال الشركه هتعرفوا بعض وهيبان العيوب والمميزات .. الشركه دى اكتر من الجواز علي فكره ..

ياريت ياريت ياريت .. اللي من غير خبره ينزل السوق اى سوق .. سوق الحديد .. فقليوب لو حد عايز يشتغل فالحديد .. يزل يلف ويسأل ويتعرف علي التجار ويسألهم وياخد بنصايحهم .. صحيح معظم التجار هيقولوا لك احنا بنخسر لكن ميهمكش .. اسمع منهم .. وهتلاقي فالاخر التجار المحترمه اللي تفيدك ..
الكلام دا فأي مجال .. ملابس .. انزل القنطره اتعب انزل الموسكي .. ادوات منزليه انزل ابو النمرس اتعب .. جنبك مصانع ادخل متخافش اسأل .. واتكلم مع صاحب المصنع او مدير المبيعات قوله ينصحك .. انزل .. كفايه تاخد معلومات من النت وانزل طبق عملي ..

قوم اطمن علي صحتك .. وخلي رزقك مبارك فيه وانت صغير .. كل ماتكبر هتتقل .. ابدأ و هتعلي وبيتك هيعلي وبلدنا هتعلي والناس كلها هتعلي .. بشغلك انت .. وهو .. وهي .. وانا .. الشغل له متعه محدش يقدر يوصفها .. 
والدى 83 سنه وعنده شركه وبيشتغل وبينزل كل يوم .. جارى 90 سنه وهو من اكبر التجار فمجاله .. والسواق بيجيله كل يوم وبينزل يشتغل ..
انزل
اعمل خطه .. هات ورقه وقلم .. انهارده .. لأ .. دلوقتى .. 
واكتب انت نفسك تبقي ايه .. 
واكتب اسهل طريقه لتحقيقه 
واكتب الخطوات اللي لازمه لتحقيقه 
وابدأ فورا فأول خطوه .. ربك هيعينك لما يلاقي اصرارك وجهدك ونيتك الطيبه ..
ومتنساش انك جاى الدنيا اساسا شويه صغيره اوى والمفروض ترجع لبيت ابوك وامك .. ترجع للجنه ..

فكل خطوه فحياتك لو مكنتش ترضي ربك .. فأنت كده بتضيع عمرك علي الفاضي .. ولاتبقي طلت دنيا ولا جنه ودى تبقي مصيبه ..
اشتغل بأمانه واخلاص وخلي الشغل طريقك للجنه ..
اتجوز وحب زوجتك فالله وخلي معاملتك لزوجتك طريقك للجنه ..
خلف .. ان قدر لك .. وربي ولادك علي انهم جايين الدنيا علشان يرضو ربهم فحياتهم وتعليمهم وشغلهم ومعاملتهم مع الناس .. ويرجعوا للجنه ..

اشتغل وعامل الناس بحب وأقف جنبهم وخليهم طريقك للجنه 
خلي هدفك فالحياه هو الجنه .. قول انا هشتغل كويس وبأتقان وامانه وحب علشان ربي يرضي عني ..
اوعي تفكر فرزقك .. لانه مكتوب لا هيزيد ولا هيقل .. مش هتموت قبل ماتاخد اخر قرش ربنا كاتبهولك .. لكن برضي ربك .. هيبارك لك فيه .. وهيخليك تستفيد منه .. وتسعد بيه وتسعد اللي حواليك ..
وعل رأي سواق ميكروباص كان كاتب كلمه جميله وكتبها اكيد لانه جربها وكل واحد فالسوق عارف كده بس الشيطان بيلعب بيه .. كان كاتب ..
.. لو كان الرزق بالجرى .. مكنش حد حصلنا ..

مش هيزيد .. فأشتغل بحب .. مش هيزيد .. فأشتغل بأمانه .. مش هيزيد .. وحب لاخوك اللي بتحبه لنفسك وعامله زى ماتحب ان الناس تعاملك ..
رزقك مش هيزيد .. لكن البركه فيه لما ربك يرض عنك هتزهلك ..
ابدأ .. وانت مطمن ان ربك معاك .. انت عليك تسعي بنيه صافيه وبهدف نبيل .. وربك عليه التوفيق .. لكن خلي بالك ..
اذا دخلت فشغل ولقيت الدنيا مأفله فوشك ومش راضيه تفتح اعرف ان الشغل دا مفيش فيه خير لك لادنيا ولا اخره .. ربك بيحبك وعايزلك الخير .. حاول فمكان تاني ومتزعلش .. افرح انه عايزلك الخير .. انت بس اسعي وخلي نيتك كويسه والله الذي لا اله الاهو ربنا هيفرح قلبك .. دا ربنا جميل اوى.
#adelelmarakshy
#عادل_المراكشي
#الهدف_جنة