أيها الأخوه والاخوات ..اكتر من حد عارضني اني بقول في مشاريع من غير ولا مليم نهائي .. وقالي مفيش الكلام دا .. لازم فلوس وفلوس كتير كمان .. او حتى قليله انما لازم فلوس .. ابتسمت وقلت له طيب مستعد تسمع عن مشروع من غير فلوس وخطوه خطوه وبكل التفاصيل وجاهز للتنفيذ فورا ..
اسمع ياسيدي ..
نزلت معرض سيارات اتفقت معاه لو جبت له عميل للعربيات نسبتي هتكون كام .. وعرفت مواصفات العربيات اللي عنده واسعارها .. روحت البيت كتبت ورقه فيها سياره للبيع .. وكتبت كلمتين تسويق من بتوعي يشدوا اللي بيقرأ .. وعلقتها فلوحه الاعلانات فالعماره ..
ورحت رايح مطلع صدقه بسيطه بنية ان ربنا ييسر لى وبما انى مش معايا ولا مليم فقررت ابتسم في وجه كل من يقابلنى بنيه الصدقه .. عدى يوم اتنين تلاته اربعه وبعدين واحد اتصل يسأل .. رحت للمعرض علشان اشوف العربيه اللي سأل عليها لسه موجوده .. لقيتها .. فأخدت الزبون ورحت المعرض وشاف العربيه . معجبتوش .. لكن عجبته عربيه تانيه ورجع تانى يوم اشتراها .. وانا استلمت اول ٥٠٠ جنيه من غير ما ادفع ولا مليم .. واسمريت علي كده وبنفس الطريقه وفعمارات تانيه احط الاعلان بشكل جميل وبكلمتين حلوين .. اهم حاجه الكلمتين الحلوين علي فكره .. والمره دى اتصدقت بفلوس بقي مش ببتسامه .. ربك كل مره كان بيجبر بخاطرى .. لان اى عيب كنت بقوله واى ميزه كنت بوضحها .. و٥٠٠ علي ٥٠٠ لغايه ما اتكون مبلغ محترم وفتحت مكان صغير ادامه واسع واتفقت مع اصحاب العمارات اي حد عايز يبيع عربيته يركنها ادامى واحط عليها يافطه للبيع .. وربك كان بيكرم أوى .. اهم حاجه كنت بعملها انى عمرى ما غشيت حد .. ولا عرفت عيب وداريته .. ولا افتريت فحد فالسعر عن السوق .. ولا نسيت اطلع صدقه .. ولا كسلت اطلع الذكاه اخر كل سنه ..
كنت واخد ربنا شريكى فالمشروع .. شوف بقي لما ربنا يكون شريكك هيعمل معاك ايه .. وكنت بأحاول مزعلوش ابدا علشان يفضل معايا .. اكتشفت ان دا سر نجاح اى مشروع .. انك متعملش حاجه تزعل ربك منك لان كل حاجه بمشيئته .. سبحانه وتعالى ..
وعملت سمعه كويسه جدا .. وبقي الكل يوصفونى لحد عايز يشترى عربيه ويقوله له روح لفلان .. دا راجل امين وهيقولك علي كل العيوب المستخبيه فأى عربيه ..
الكلام دا كان بيسعدنى جدا .. وبيشجعني وبيخلينى احاول اكون افضل .. وربنا كرمني كرم مكنتش احلم بيه ولا اتخيله..
بس كده .. آدى مشروع من غير ولا مليم وبالتفصيل خطوه خطوه .. وممكن تعمله بدل العربيات فشقه او فيلا او عماره او اى حاجه قابله للبيع..
اظن دلوقتى مفيش حجه .. رأسمال مجهودك .. وذكاءك التسويقي .. وسمعتك الطيبه .. ونيتك الصافيه .. وانزل .. انزل .. هتبقي حاجه كبيره .. انما لو فضلت قاعد علي النيله دا تدور علي فكره مشروع .. عمرك هيضيع .. فالوقت اللي غيرك قفل النت ونزل .. وبدأ .. وربنا كرمه .. وانت لسه عمال تدخل من جروب وتطلع من جروب تقرأ افكار المشاريع .. وخايف .. ومتردد .. ويائس.. ابعد الخوف واليأس عن نفسك لو كنت مؤمن بالله .. انهارده هات ورقه وقلم وخطط ممكن تبدأ ازاى .. اكتب كل حاجه ممكن تعملها .. خطوه خطوه .. لازم تكتب من غير كتابه تخطيطك ممكن يفشل ..
اصحي بكره .. ابتسم اتوضي وصلي ركعتين بنية ان ربك يوفقك .. افطر .. البس هدومك .. بلاش الچينز المقطع
😃 .. واتوكل علي الله وابدأ اول خطوه كتبتها .. اتعب يوم اتنين تلاته .. ومستحيل ربنا ميجبرش بخاطرك .. فهو الرحمن الرزاق الجبار .. اوعي تكسل .. غيرك بدأ ودلوقتى بقي حاجه تانيه خالص .. انت مش اقل من حد .. ابدأ من بكره الصبح .. وبعد كام شهر تعالي احكي لنا عن فضل الله عليك .. سامع من بكره الصبح مش من بعد بكره ..وربنا معاك.
#عادل_المراكشي #adelelmarakshy
#الهدف_جنة
ليست هناك تعليقات:
إرسال تعليق